From the VRI Chaṭṭa Saṅgāyana edition. PTS: Sn, 018. This is part of the text-cluster of BZA (T.100) sutra 277.
Evaṃ me sutaṃ– ekaṃ samayaṃ bhagavā sāvatthiyaṃ viharati jetavane
anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ gāthāya ajjhabhāsi–
“Parābhavantaṃ purisaṃ, mayaṃ pucchāma gotama
[var] ;
bhagavantaṃ [var] puṭṭhumāgamma, kiṃ parābhavato mukhaṃ”.
“Suvijāno bhavaṃ hoti, suvijāno [var] parābhavo;
dhammakāmo bhavaṃ hoti, dhammadessī parābhavo”.
“Iti hetaṃ vijānāma, paṭhamo so parābhavo;
dutiyaṃ bhagavā brūhi, kiṃ parābhavato mukhaṃ”.
“Asantassa piyā honti, sante na kurute piyaṃ;
asataṃ dhammaṃ roceti, taṃ parābhavato mukhaṃ”.
“Iti hetaṃ vijānāma, dutiyo so parābhavo;
tatiyaṃ bhagavā brūhi, kiṃ parābhavato mukhaṃ”.
“Niddāsīlī sabhāsīlī, anuṭṭhātā ca yo naro;
alaso kodhapaññāṇo, taṃ parābhavato mukhaṃ”.
“Iti hetaṃ vijānāma, tatiyo so parābhavo;
catutthaṃ bhagavā brūhi, kiṃ parābhavato mukhaṃ”.
“Yo mātaraṃ [var] pitaraṃ vā, jiṇṇakaṃ gatayobbanaṃ;
pahu santo na bharati, taṃ parābhavato mukhaṃ”.
“Iti hetaṃ vijānāma, catuttho so parābhavo;
pañcamaṃ bhagavā brūhi, kiṃ parābhavato mukhaṃ”.
“Yo brāhmaṇaṃ [var] samaṇaṃ vā, aññaṃ vāpi vanibbakaṃ;
musāvādena vañceti, taṃ parābhavato mukhaṃ”.
“Iti hetaṃ vijānāma, pañcamo so parābhavo;
chaṭṭhamaṃ bhagavā brūhi, kiṃ parābhavato mukhaṃ”.
“Pahūtavitto puriso, sahirañño sabhojano;
eko bhuñjati sādūni, taṃ parābhavato mukhaṃ”.
“Iti hetaṃ vijānāma, chaṭṭhamo so parābhavo;
sattamaṃ bhagavā brūhi, kiṃ parābhavato mukhaṃ”.
“Jātitthaddho dhanatthaddho, gottatthaddho ca yo naro;
saññātiṃ atimaññeti, taṃ parābhavato mukhaṃ”.
“Iti hetaṃ vijānāma, sattamo so parābhavo;
aṭṭhamaṃ bhagavā brūhi, kiṃ parābhavato mukhaṃ”.
“Itthidhutto surādhutto, akkhadhutto ca yo naro;
laddhaṃ laddhaṃ vināseti, taṃ parābhavato mukhaṃ”.
“Iti hetaṃ vijānāma, aṭṭhamo so parābhavo;
navamaṃ bhagavā brūhi, kiṃ parābhavato mukhaṃ”.
“Sehi dārehi asantuṭṭho [var] , vesiyāsu padussati [var] ;
dussati [var] paradāresu, taṃ parābhavato mukhaṃ”.
“Iti hetaṃ vijānāma, navamo so parābhavo;
dasamaṃ bhagavā brūhi, kiṃ parābhavato mukhaṃ”.
“Atītayobbano poso, āneti timbarutthaniṃ;
tassā issā na supati, taṃ parābhavato mukhaṃ”.
“Iti hetaṃ vijānāma, dasamo so parābhavo;
ekādasamaṃ bhagavā brūhi, kiṃ parābhavato mukhaṃ”.
“Itthiṃ soṇḍiṃ vikiraṇiṃ, purisaṃ vāpi tādisaṃ;
issariyasmiṃ ṭhapeti [var] , taṃ parābhavato mukhaṃ”.
“Iti hetaṃ vijānāma, ekādasamo so parābhavo;
dvādasamaṃ bhagavā brūhi, kiṃ parābhavato mukhaṃ”.
“Appabhogo mahātaṇho, khattiye jāyate kule;
so ca rajjaṃ patthayati, taṃ parābhavato mukhaṃ”.
“Ete parābhave loke, paṇḍito samavekkhiya;
ariyo dassanasampanno, sa lokaṃ bhajate sivan”ti.
This file is part of the Bieyi za ahan (T.100) project at the Dharma Drum Buddhist College.
Source files coded with TEI.